“Bu gün dünyada ailə quran beş nəfərdən biri sosial şəbəkə vasitəsiylə tanış olurlar”

Bunu ailə məsələləri üzrə ekspert, ictimai xadim Hacı Quliyev “ANS” telekanalında yayımlanan “İncə Maraqlar” verilişində qonaq olarkən deyib. Ekspert, gənclərə və valideynlərə müraciət edib. O, xüsusilə müğənnilərə və tanınmış şəxslərə səslənərək qeyd edib ki, sosial şəbəkədən istifadə zamanı diqqətli olsunlar:

“İctimaiyyət arasında çox olan insanlar daha çox diqqət çəkirlər və sosial şəbəkələrdə izlənirlər. Xüsusilə, müğənnilər və tanınmış simalar paylaşdıqları şəkillərə , yazdıqları şərhlərə görə diqqətli olmalıdırlar. Bu həm onların özləri üçün, həm də onları izləyənlər üçün mənfi-müsbət təsiri ola bilər. Çünki tanınmış şəxslərin mindən, hətta milyondan artıq izləyiciləri var. İzləyicilər arasında gənclərin çoxluq təşkil etdiyini nəzərə alsaq, bu məsələyə biganə qalmaq olmaz. Gələcək nəsil bizdən nə öyrənəcək?!”

H.Quliyev, valideynlərin övladlarını sosial şəbəkənin pis məqamlarından necə qoruya bilməsindən də danışıb:

“Son statistik məlumatlara görə, sosial şəbəkələr istifadəçiləri arasımnda azyaşlı uşaqlara da rast gəlinir.Valideynlər övladlarını qorumaq üçün özləri sosial şəbəkədə işləməyi övladlarından yaxşı bilməlidir. Daha sonra uşaqların kimlərlə dostluq etməsinə xüsusi diqqət yetirməlidirlər. Çünki müəyyən dini sektalar, insanlar var ki, uşaqları xoşagəlməyən işlərə, inanclara cəlb edirlər. Nəticədə də uşağa psixoloji təsir göstərilir.”