Azərbaycanda Ulu Öndər Heydər Əliyevin 92-ci il dönümünə və Gül bayramına həsr olan silsilə tədbirlər keçirilir.

... məlumatına görə, “Ben production”un baş prodüseri və Roza Zərgərlinin şəxsi prodüseri Humay Muxtarova da Hacıqabul rayonunda Ulu Öndər Heydər Əliyevin 92-ci il dönümünə və Gül bayramına həsr olunan bayram konserti təşkil edib. Prodüser təşkil etdiyi konsertin təffərrüatlarını mətbuata açıqlayıb:

“Hacıqabul rayonundandan əvvəl Saatlı və başqa rayonlarda keçirilən konsertlərdə iştirak etdik. Amma Hacıqabul rayonunda keçirilən konsertin texniki işlərinə Hacıqabul rayon İcra Hakimiyyəti, yaradıcı işlərinə isə mən nəzarət edirdim. Bu səbəbdən də konsertin təşkilatçılığı mənə həvalə olunmuşdu. Zabir Əliyevin aparıcısı olduğu konsertdə müğənnilər Gülüstan Əliyeva, Zakir Əliyev, Roza Zərgərli, o cümlədən gənc müğənnilər də çıxış etdilər. Roza Zərgərlinin çıxışı daha çox yadda qalan oldu. Çünki o, Uluöndərə həsr olunan “Yaşasın, Uluöndər!” mahnısını ifa etdi və atəşfəşanlıqla konsertin bağlanışı onun ifası ilə bitdi. Bu arada, mahnının sözlərinin müəllifi Roza xanıma məxsusdur.

Həmçinin konsert zamanı Zabir Əliyev Zərifə xanım Əliyevaya “Ana” şeirini söylədi ki, bu da yaddaqalan məqamlardan oldu.”

H.Muxtarova qeyd edib ki, çox uğurlu və möhtəşəm keçən konsert proqramı Hacıqabul sakinlərinin yaddaşında uzun illər silinməyəcək:

“Konsertdən sonra şəxsən Hacıqabul rayon icra hakimiyyətinin başçısı Əhməd Muxtarov mənimlə görüşdü və minnətdarlığını bildirdi. Daha sonra yaradıcı kollektivin qarşısında çıxış edən icra başçısı hər bir şəxsə yaradıcılıq fəaliyyətlərində uğurlar arzuladı.”

Prodüser, qarşıdan gələn 28 May Respublika günü münasibəti ilə də bir neçə rayonlarda, o cümlədən uşaqlar evlərdində konsert proqramları təşkil edəcəyini söyləyib:

“Bu, mənim iş prinsipimdə ənənə halını olub. Çünki hər il çalışıram ki, bir neçə uşaq evlərində konsert proqramı təşkil edim. Kimsəsiz uşaqlar dəstək olmaq xoş hisdir. Bundan mənəvi zövq alıram. Biz də kiminsə övladıyıq, onlar da. Mən də anayam. Amma onlar valideynlərini görməsələr də, çalışmalıyıq ki, ildə bir dəfə olsa, onlara xoş günlər yaşadaq. Onların buna çox ehtiyacı var. Gücüm çatdığım qədər onları sevindirməyə çalışıram. İnşallah, bu il də Xəzər rayonunun Şağan kəndindəki 3 nömrəli əqli və fiziki cəhətdən qüsurlu uşaqlar üçün internat evində tədbir nəzərdə tutmuşam. Tədbirdə mədəniyyət və incəsənət nümayədələri iştirakı ilə şən əhval-ruhiyyədə konsert proqramı təşkil etməyi düşünürəm.”