Görkəmli teatr və kino aktyoru, Respublikanın Xalq Artisti Ağahüseyn Cavadovun 120 illik yubileyinə həsr olunmuş xatirə gecəsi



12 iyun saat 18.00-da Akademik Milli Dram Teatrında görkəmli teatr və kino aktyoru, Respublikanın Xalq Artisti Ağahüseyn Cavadovun 120 illik yubileyinə həsr olunmuş xatirə gecəsi keçiriləcək. Teatrın foyesində baş tutacaq gecənin rejissoru və ssenari müəlifi Loğman Kərimov, aparıcısı sənətşünaslıq doktoru, professor Məryəm Əlizadədir. Tədbirdə görkəmli aktyorun çəkildiyi “Bəxtiyar”, “Sehirli xalat”, “Bir qalanın sirri”, “Əhməd hardadadır?”, “Qızmar günəş altında” filmlərdən fraqmentlər nümayiş olunacaq, aktyorlar, sənətşünaslar sənətkar haqqında fikirlərini bölüşəcəklər. Gecədə həmçinin Gülyanaq və Gülyaz Məmmədova bacılarının və Anar Şuşalının ifasında müxtəlif musiqi parçaları da səslənəcək.

Mahir komediya ustası, xarakter maskalarından məharətlə istifadə edən, tipaj yaratmaqda səriştəli aktyor, satirik obrazların ifasında qroteskdon həssaslıqla bəhrələnən Ağahüseyn Xəlil oğlu Cavadov 22 aprel 1894-cü ildə Bakının yaxınlığındakı Xırdalan qəsəbəsində doğulub. Əvvəl mollaxanada təhsil alan Ağahüseyn 1919-cu ildə "Səadət" məktəbini bitirib.

Teatr sənətinə tələbəlik illərindən maraq göstərən, bəzi tamaşalarda sözsüz və epizod rollara çıxmış Ağahüseyn Cavadov 1920-ci ilin iyunundan müəyyən fasilələrlə Milli Dram Teatrında işləyib.

Ağahüseyn Cavadov Milli Dram Teatrının səhnəsində Məmişov, Cəlal, Soraq kişi ("Məhəbbət", ("Həyat" və "Yaxşı adam" M.İbrahimov), Dəmirçi Musa, Bərbərzadə, Mirzə Salman ("Toy", "Xoşbəxtlər" və "Nişanlı qız", S.Rəhman), Ocaqqulu, Xosməmməd, Həmzə, İmamverdi, Oddamdı ("Almaz", "Dönüş", "Solğun çiçəklər", "1905-ci ildə" və "Od gəlini", C.Cabbarlı), Qənimət ("Cavanşir", M.Hüseyn), Mürsəl ("Qaçaq Nəbi", S.Rüstəm), Usta Murad ("İldırım", C.Məcnunbəyov), Bəbir Bəbiroviç, Qoşqar baba ("Yadigar" və "Yol ayrıcında", İ.Səfərli), İmran ("Əcəb işə düşdük", Ş.Qurbanov), Savalan ("Dağlar qızı", A.Babayev), Vasin ("Tanya", A.Arbuzov), Kapitan ("Köç", C.F.Başqut), Luka Lukiç ("Müfəttiş", N.Qoqol) Brabansio, Qoca çoban ("Otello" və "Qış nağılı", U.Şekspir), Petruşin ("Canlı meyit", L.Tolstoy), Sima Popoviç ("Nazirin xanımı", B.Nuşiç), Houkinis ("Şeytanın şagirdi", B.Şou), Platon, Məzarçı ("Şeyx Sənan" və "Xəyyam", H.Cavid), Qoca ("Şöhrət və ya unudulan adam", N.Hikmət), Maytreya ("Hind gözəli", Y.Osnos və V.Vinnikov), Almurad ("Mənim günahım", İ.Əfəndiyev) rollarında çıxış edib. Ağahüseyn Cavadov "Bəxtiyar" (Rza), "Qızmar günəş altında" (Pirioğlu), "Əhməd haradadır?" (Əhməd), "O olmasın, bu olsun" (Bəy), "Bir qalanın sirri" (Rəmmal), "Sehrli xalat" (Vəzir), "Görüş" (Əbülfəz), "Şərikli çörək" (Xırdavatçı) və digər filmlərə çəkilib. Aktyor 1931-ci ildə respublikanın əməkdar artisti, 4 dekabr 1938-ci ildə isə xalq artisti fəxri adlarına layiq görülüb. Ağahüseyn Cavadov 20 iyul 1981-ci ildə Bakıda vəfat edib.