Bazar e., 20.12.2010, 22:41 (GMT+5)





Bütöv Azərbaycan Gənclər Təşkilatının təsisçiliyilə fəaliyyət göstərən Bütöv Azərbaycan Məktəbində BAGT və Borçalı GT-nın təşkilatçılığı ilə “Güney Azərbaycan və bu gün” mövzusunda dərs oldu. Dərsi DAK-ın Daimi Şurasının sədri Əjdər Tağızadə dedi.

Tədbiri Azərbaycanın Dövlət himnilə açıq elan edən Bütöv Azərbaycan Gənclər Təşkilatının sədri Ruslan İzzətli Bütöv Azərbaycan Məktəbinin məqsədi və geçirdiyi dərslər haqqında iştirakçılara məlumat verdi. “Bütöv Azərbaycan Məktəbini qurmaqda məqsədimiz gəncləri Bütöv Azərbaycan ideologiyası ətrafında elmi şəkildə birləşdirmək və vətənimizin harayını dünya ictimaiyyətinə çatdırmaqdır”, – dedi Ruslan bəy.



BAGT sədri R. İzzətli daha sonra sözü Əjdər Tağızadəyə verdi.



Əjdər bəy gəncləri salamladı və belə tədbirlərin keçirilməsinin əhəmiyyətinin çox olduğunu bildirdi: “Güney Azərbaycanda yaşayan türklər istər şah rejimində, istərsə də indiki molla rejimində həmişə basqıya məruz qalıb. Hər zaman da soydaşlarımız mübarizə aparıb. Doğrudur, bu mübarizələrin bir çoxu proqramsız və pərakəndə olsa da millətimiz heç zaman əsarətə baş əyməyib. Seyid Cəfər Pişəvəri 1940-cı illərdə böyük bir hərəkata başladı. Doğrudur, Pişəvərinin böyük qətiyyəti vardı, amma təəssüflər ki, Pişəvəri o zaman Azərbaycanın müstəqilliyini ortaya qoymadı. Necə ki, M.Ə.Rəsulzadə cənabları 1918-1920-ci illərdə Quzey Azərbaycanın müstəqilliyini ortaya qoydu, gərək Pişəvəri də 1940-cı illərdə Güney Azərbaycanın müstəqiliyini ortaya qoyardı. Əgər o belə bir addım atardısa, indi Güney Azərbaycandakı proseslər daha sürətlə addimlayardı.



Bu gün mən DAK-ın rəhbərliyində təmsil olunan bir şəxs kimi dünyanın bir çox ölkələrinin tribunalarından, parlamentlərindən Güney Azərbaycanın haqqını dünyaya çatdırıram. Bu, bizim borcumuzdur, harda olmağımızdan asılı olmayraq Bütöv Azərbaycan ideyasını yaşatmalı və bunun reallaşması üçün çalışmalıyıq. Bu yöndə siz gənclik aktiv olmalı və çalışmalısız”.



Daha sonra gənclərin suallarını cavbalandıran Əjdər Tağızadə Borçalı və Dərbənd haqda da gördükləri işlərdən danışdı: “2008-ci ilin avqust ayında Rusiya Gürcüstana hücum edəndə Sabir Rüstəmxanlı və mən Borçalıda soydaşlarımızla görüşürdük. Mən o zaman bildirdim ki, əgər Gürcüstan parçalanacaqsa Borçalılar öz haqlarını alacaq. Bizim işimiz təkçə Güney Azərbaycan deyil. Borçalı və digər ərazilərimizdə yaşayan soydaşlarımızın haqları ilə maraqlanırıq və bu yöndə çalışırıq. Təbii ki, işimizin çox hissəsi Güney Azərbaycanla bağlıdır. Çünki ərazimizin çox hissəsi də elə Güney Azərbaycandadır”.



Əjdər bəy gənclərin Güney Azərbaycan və ümumilikdə Bütöv Azərbaycanla bağlı suallarını cavablandırdı. Tədbir maraqlı diskussiya ilə sona çatdı.



BAGT Mətbuat Xidməti