Gürcüstanda yaşayan 80 nəfərə qədər azərbaycanlı gənc bir həftə Xəzər sahilində istirahət edəcək. Bu barədə Azərbaycanlıların Mədəniyyət Mərkəzinin mətbuat katibi Nərgiz Əliyeva bildirib. İyulun 25-dən başlanan istirahət günləri bir həftədən sonra Xəzərin sahilində Novxanıda yerləşən AF Hotel-Aqua park istirahət mərkəzində bitəcək. Gənclər Bakının gəzməli, görməli yerlərində olacaq, tarixi abidələrə baxacaq, muzeylərdə olacaq, digər mədəni-kütləvi tədbirlərdə iştirak edəcək, Azərbaycanın görkəmli şəxsləri ilə görüşlər keçirəcəklər. Gənclərin istirahəti Azərbaycanın Diasporla İş üzrə Dövlət Komitəsinin dəstəyi ilə baş tutacaq. N.Əliyeva bildirib ki, hazırda AMM-in təşkilatçılığı ilə siyahılar dəqiqləşdirilir. Müxtəlif QHT təşkilatlarından nümayəndələr, Gənclər ittifaqının üzvləri, gürcü ali məktəblərində təhsil alan tələbələr dincəlməyə gedəcəklər. Xatırladaq ki, keçən il də 80 nəfərədək gənc Azərbaycanın Diasporla İş üzrə Dövlət Komitəsinin dəstəyi ilə Xəzər sahilində dincəlib.