ADMİU-nun tələbələri Təhsil Nazirliyinin təşkil etdiyi Gənclər Günü ilə bağlı tədbirdə iştirak edib



Fevralın 1-də Gənclər Günü ərəfəsində Təhsil nazirinin gənc müəllimlərlə görüş keçirilib.

Əvvəlcə tədbir iştirakçıları “İçərişəhər” Dövlət Tarix-Memarlıq Qoruğuna ekskursiya ediblər.

Daha sonra “Muğam Klub”da Təhsil Nazirliyinin rəhbər heyətinin iştirakı ilə gənc müəllimlərlə görüş keçirilib.

Təhsil naziri Ceyhun Bayramov müəllimləri 2 fevral - Gənclər Günü münasibəti ilə təbrik edərək onlara gələcək fəaliyyətlərində uğurlar arzulayıb. Ceyhun Bayramov gənclər siyasətinin dövlətin əsas prioritetlərindən biri olduğunu, bu istiqamətdə ölkə Prezidenti cənab İlham Əliyev tərəfindən çoxsaylı sərəncamlar imzalandığını, layihələr həyata keçirildiyini bildirib.

Gənc müəllimlərlə görüşdən məmnun olduğunu vurğulayan Ceyhun Bayramov şagirdlərin milli dəyərlər əsasında formalaşmasında hər bir müəllimin üzərinə düşən vəzifələrdən danışıb. Çıxışının sonunda nazir gənc müəllimlərə Azərbaycanın sabahı naminə fəaliyyətlərində uğurlar arzulayıb.

Tədbir bədii hissə ilə davam edib. Azərbaycan Dövlət Mədəniyyət və İncəsənət Universitetinin, Bakı Musiqi Akademiyasının və Milli Konservatoriyanın tələbələri rəngarəng bədii proqramla çıxış ediblər. ADMİU-nun Teatr sənəti fakültəsinin tələbələri Hüseynağa Aslanov, Ağəli Kərimzadə və Sabirə Abdullayeva Musiqi sənəti fakültəsinin tələbəsi Cabbar Paşazadənin udda müşayiəti ilə İmadəddin Nəsiminin qəzəllərini səsləndiriblər.