Bakı Mühəndislik Universiteti, Bakı Dövlət Universiteti, ADA Universiteti, NAPCAR, IEEE Computer Society Azərbaycan bölməsi, ACM Azərbaycan bölməsi, BEU ACM Tələbə bölməsi, BMU “ACM ICPC və IOI Təlim Mərkəzi”nin təşkilatı dəstəyi ilə “43-cü ACM ICPC Universitet Tələbələrinin Beynəlxalq Proqramlaşdırma Müsabiqəsi”ninnövbəti 1/4 final mərhələsi(XIV Azərbaycan Çempionluğu) 27 oktyabr 2018-ci il tarixində Bakı Mühəndislik Universitetində keçirilib. Müsabiqədə 17 ali təhsil müəssisəsindən 45 komanda və 7 məktəblilər komandası (müsabiqədən kənar) iştirak edib.

Tədbirdə açılış nitqi ilə çıxış edən universitetin rektoru, professor Havar Məmmədov müsabiqə iştirakçılarını salamlayıb və iştirakçılara uğurlar arzulayıb. İT sahəsinin dünyanın, eləcə də müasir dövrdə ölkəmizin inkişafındakı rolundan danışıb. Bakı Mühəndislik Universitetində İT sahəsi üçün yüksək səviyyəli müasir laborotoriyalar və kadr potensialının olduğunu diqqətə çatdıran rektor universitetin maddi-texniki bazasının beynəlxalq müsabiqələrin keçirilməsi üçün lazım olan tələblərə cavab verdiyini və bu da müsabiqənin təşkilatçıları tərəfindən rəğbətlə qarşılandığını qeyd edib.

Müsabiqəsinin Azərbaycan Respublikası üzrə regional drektoru Bakı Dövlət Universetinin dosenti Ramin Mahmudzadə çıxış edərək, müsabiqənin əhəmiyyətindən danışıb. Ümumilikdə bu müsabiqə dünyada iştirakçıların sayına, elmi və texnoloji səviyyəsinə görə ən prestijli müsabiqədir. Müsabiqə iştirakçıları dünyanın ən nüfuzlu universitetlərinin tələbələridir. Bu müsabiqədə iştirak etmiş tələbələr məzun olduqdan sonra İnformasiya Texnologiyaları sektorunda dünyanın məşhur və aparıcı şırkətləri tərəfindən iş təklifi alırlar.

Sonra münsiflər heyyətinin sədri və müsabiqənin Azərbaycan üzrə koordinatoru Bakı Mühəndislik Universitetinin baş müəllimi Etibar Seyidzadə müsabiqənin şərtləri, keçirilmə qaydaları və texniki məsələlər haqqında məlumat verib.

Komandalara 5 saat ərzində 12 alqoritmik məsələni C, C++, Java və ya Python proqramlaşdırma dillərində həll etmək tapşırığı verilib. Qiymətləndirmə http://neerc.ifmo.ru/contest/ saytında online avtomatik qiymətləndirmə sistemi ilə aparılıb.

Müsabiqənin nəticələrinə görə Baku Engineering University 1 komandası I, ADA University 1 komandası II, Baku Engineering University 4 və Baku State University 4 komandaları III, Baku Higher Oil School 1 komandası IV yerə layiq görülüblər. Daha 4 komanda II dərəcəli diploma, 4 komanda III dərəcəli diploma, 11 komanda yüksək nailiyyət sertifikatına, 31 komanda fərqlənmə sertifikatına layiq görülüblər.

Müsabiqədə müvəffəqiyyət qazanmış komandalar 1-2 dekabr 2018-ci il tarixlərində Gürcüstan Respublikasının Tbilisi şəhərində keçiriləcək “43-ci ACM ICPC - Universitet Tələbələrinin Proqramlaşdırma üzrə Beynəlxalq” müsabiqəsinin növbəti yarımfinal mərhələsində və “Cənubi Qafqaz açıq çempionatı”nda iştirak etmə hüququ əldə etmişlər.