8 Mart - Beynəlxalq Qadınlar Günü münasibəti ilə Bakı Mühəndislik Universitetində bayram tədbiri keçirilib. Tədbirdə universitetin rektoru, professor Havar Məmmədov və universitetin müəllim tələbə heyəti iştirak edib.

Universitetin rektoru, professor Havar Məmmədov çıxışında bildirib ki, bəşəriyyətin ən istedadlı, zəngin mədəniyyətə malik xalqlarından olan Azərbaycan xalqı şanlı mübarizə yolu keçərək, bu gün dünyada misilsiz nailiyyətləri ilə tanınır, gündən-günə nüfuzu artır. Nailiyyətlərin əldə edilməsində Azərbaycan qadınının böyük rolu var. Rektor qeyd edib ki, Azərbaycan qadınına ən yüksək qiyməti Ümummilli liderimiz Heydər Əliyev verib. Məhz Heydər Əliyevin Azərbaycan qadınının cəmiyyətdəki roluna, Azərbaycan qadınının Heydər Əliyev siyasətinə verdiyi yüksək dəyər ölkədə qadın fəallığı ənənələri tarixinə yeni səlnamələr yazıb. Cəmiyyətdə qadınların mövqeyini möhkəmləndirmək üçün Heydər Əliyevin Azərbaycan tarixində ilk dəfə olaraq Qadın Problemləri üzrə Dövlət Komitəsinin yaradılması barədə sərəncamı və “Azərbaycan Respublikasında Dövlət Qadın Siyasətinin həyata keçirilməsi haqqında” fərmanı Dövlət Qadın Siyasətinin inkişaf istiqamətlərinin müəyyənləşdirilməsi istiqamətində atılan tarixi addımlardan biri oldu. Ümummilli liderimiz Heydər Əliyev qadınlarla bağlı siyasətin gücləndirilməsini dövlətin mühüm, prioritet vəzifələrindən biri hesab edirdi.

Ulu öndərin müdrik ənənələri Azərbaycan Respublikasının Prezidenti cənab İlham Əliyev tərəfindən layiqincə davam etdirilir və bu gün qadın siyasəti dövlət siyasətinin tərkib hissəsidir. Azərbaycan qadınlarının lideri, Heydər Əliyev Fondunun prezidenti, birinci vitse prezident Mehriban xanım Əliyevanın geniş vüsətlə inkişaf edən ölkəmizə, həmçinin Azərbaycan təhsilinə verdiyi töhfələr Azərbaycan qadınının zəkasının, güc və qüdrətinin bariz nümunəsidir.

Rektor, 8 Mart-Beynəlxalq Qadınlar Günü münasibəti ilə hər zaman universitetin ictimai-siyasi həyatında yaxından iştirak edən bütün qadınları təbrik edib, onlara xoşbəxtlik və səadət, firəvan həyat, uzun ömür, can sağlığı arzulayıb.

Tədbirdə universitet rəhbərliyi tərəfindən fəal qadın əməkdaşların və tələbələrin bir qrupuna fəxri fərmanlar, qiymətli hədiyyələr və təravətli gül-çiçəklər təqdim olunub.

Tədbir universitetin mədəniyyət şöbəsinin təşkilatçılığı ilə universitetin əməkdaşlarının və tələbələrinin ifasında rəngarəng konsert proqramı ilə davam edib.