“Azərbaycanın xalq artisti Nazpəri Dostəliyeva Azərbaycan Dövlət Mədəniyyət və İncəsənət Univrsitetində vokal müəlliməm olub. Nazpəri xanım gözəl səsli sənətçimizdir, fəxrimizdir. Amma buna baxmayaraq, mənə qarşı edilən haqsızlıqlara göz yuma bilmirəm. Belə ki, o, mənə vəd verdiyi və böyük ümidlərlə gözlədiyim sözdə dəstəyini bu günə qədər əsirgəyib.”

Bunu xalq artistinin tələbəsi, müğənni Aref Kemal mətbuata açıqlamasında deyib. O, bildirib ki, Nazpəri Dostəliyevanın ona qarşı laqeyd münasibəti dəfələrlə olub:

“Təxminən ilyarım əvvəl Xəzər Televiziyasından çəkiliş qrupu gəlmişdi. Nazpəri xanım da yeddi tələbəsinin ifalarını təqdim edirdi. Mən də ifamı təqdim etmişdim, amma efir rejissoru onu kəsib, efirə verməmişdi. O biri tələbələrin ifaları isə verilişdə yayımlanmışdı. Buna görə də inciklik yaranmışdı. Nazpəri xanım orada mənə söz verdi ki, səni həm öz tələbəm kimi, həm də əlavə verilişlərə dəvət alanda köməklik göstərəcəyəm. Onu da dedi ki, məni başqa müğənnilərlə səhv salma, sözümə əməl edənəm. İnanıram ki, verdiyi sözə nə vaxtsa əməl edəcək. Onun mənim üzərimdə çox böyük əməyi olub. Mərd xanımdır, amma uman yerdən küsərlər!

Demirəm ki, Nazpəri xanım cibindən pul verib, məni verilişlərə çıxartsın. Onun dediyinə görə, tələbələri digər sənətçilərin tələbələrindən səs baxımından güclüdür. Məsələn, əməkdar artist Nüşabə Ələsgərli şəxsi “İnstagram” səhifəsində tələbələrinin şəkillərini paylaşır və tələbələri ilə fəxr etdiyini yazır. Nüşabə xanım son 3-4 il ərzində tələbələrinə qarşı diqqətli olduğu üçün onları Azərbaycan xalqına tanıdıb. Nazpəri xanım da ən azından öz “İnstagram” səhifəsində məhz məni deyil, digər tələbələrinin şəkillərini paylaşmaqla da onlara müəyyən qədər dəstək ola bilərdi. Ona görə də umuram və küsürəm!”

A.Kemalın sözlərinə görə, şəxsən müəlliməsinə qarşı heç vaxt diqqətsiz olmayıb və onun tələbəsi olmaqla fəxr edir:

“ADMİU-nun estrada müğənnisi fakültəsini bitirmişəm. Maraqlıdır ki, universiteti bitirdiyim gündən bu vaxta qədər Nazpəri xanıma qarşı diqqətsiz olmamışam. Bayramlar da təbrik mesajları göndərirəm, vəziyyətini soruşuram, amma faydasızdı. Çünki bir dəfə də olsun heç vaxt nə mesajlara, nə də zənglərə cavab verməyib.”

“Azərbaycanın səsi” mahnı müsabiqəsinin sevilən iştirakçılarından olan A.Kemal, həmçinin “Azərbaycan Xəzər Dəniz Gəmiçiliyi” Qapalı Səhmdar Cəmiyyəti, Xəzər Dəniz Neft Donanması İdarəsində 10 ildir şturman vəzifəsində çalışır.