Məlum olduğu kimi, Azərbaycan Respublikasının mədəniyyət və turizm naziri Əbülfəs Qarayevin rəhbərlik etdiyi nümayəndə heyəti 2016-cı ilin 31 oktyabr - 1 noyabr tarixində Misir Ərəb Respublikasının Luksor şəhərində keçirilən Birləşmiş Mİllətlərin Ümumdünya Turizm Təşkilatının İcraiyyə Şurasının 104-cü Sessiyasında iştirak edir.

Qeyd edək ki, 1 noyabr tarixində tədbirin yekun görüşləri keçirilmiş və İcraiyyə Şurasının 104-cü Sessiyası öz işini başa vurmuşdur. Tədbir çərçivəsində BMÜTT-nin Baş Katibliyinin və Proqram və Büdcə Komitəsinin müvafiq hesabatları, 2018-2019-cu illər üzrə Ümumi İş Proqramı, eləcə də Azərbaycanın Ümumdünya Turizm Təşkilatının İcraiyyə Şurasının sədri seçilməsi və bir sıra digər mühüm məsələlər haqqında qərarlar təsdiq edilmişdir.

Sözügedən tədbirin ardınca BMÜTT-nin "Şəhər turizmi üzrə 5-ci Qlobal Sammiti" öz işinə başlamışdır. Tədbirin açılışında BMÜTT-nin Baş Katibi cənab Taleb Rifai, Misir Ərəb Respublikasının turizm naziri cənab Yehia Raşed, Luksor şəhərinin qubernatoru Muhamed Sayed Bedr və Ümumdünya Turizm və Səyahətlər Şurasının prezidenti David Skousil çıxış etmişdir.

Daha sonra "Perspektivlər və çətinliklər" mövzusunda Şəhər Turizmi üzrə yüksək səviyyəli panel iclası keçirilmişdir. Panelçi qismində çıxış edən mədəniyyət və turizm naziri Əbülfəs Qarayev şəhər turizmi, bu turizm növünün inkişafı perspektivləri, onun sosial və iqtisadi təsirləri və potensial problemlər haqqında ətraflı məlumat vermişdir.

Şəhər turizmində davamlı və hərtərəfli inkişafa nail olmaq məqsədilə hansı işlərin görülməli olduğunu qeyd edən Nazir, bu növ turizmin multi-funksional təbiətinin çox dəqiq planlaşdırma və idarəetməyə ehtiyac yaratdığını vurğulamışdır. Çıxış zamanı Əbülfəs Qarayev ölkəmizin paytaxtında, eləcə də digər böyük şəhərlərdə bu növ turizmin planlaşdırılması və gələcək perspektivlər, bu sahə üzrə inkişafın təmin edilməsi məqsədilə görüləcək işlər barədə geniş məlumat təqdim etmişdir. İclas şəhər turizmi mövzusu ətrafında müvafiq müzakirələrlə davam etmişdir.

Məlumat üçün bildiririk ki, "Şəhər turizmi üzrə 5-ci Qlobal Sammit" öz işini sabah davam etdirəcəkdir.