Cavanşir Atəşi vətənpərvər bir türk kimi öz yaradıcılığında hər zaman ulu Türk Dünyasına sevgisini vəsf edir. Onun bu yaxınlarda Azərbaycanın və Türkiyənin müxtəlif mətbuat orqanlarında dərc edilən Çanaqqala zəfərinin 100 illiyinə ithaf olunmuş “Bayramın mübarək, Salam, Türkiyəm!” şeiri oxucular tərəfindən rəğbət və məhəbbətlə qarşılanmışdır.





Həmin şeir çox qısa müddətdə müxtəlif mətbuat səhifələrində dərc edilməklə yanaşı bir çox saytlarda da yerləşdirilmişdir. Təkcə Azərbaycan Yazıçılar Birliyinin saytında (www.ayb.az.) yerləşdirilən

“Bayramın mübarək, Salam, Türkiyəm” şeiri saytda ən çox oxunan (18.04.2015-ci il tarixdən bu kitab çapa hazırlananadək 40 mindən çox baxış sayı) olmuşdur.









































BAYRAMIN MÜBARƏK, SALAM, TÜRKİYƏM!



Türkiyədə Çanaqqala

zəfərinin 100 illiyinə ithaf edirəm.



Azərim, Osmanlım, Turanlım mənim,

Yapanım, yaradıb-quranım mənim.

Ey canım, ürəyim, gözüm Türkiyəm!

Ey dostum, qardaşım, özüm Türkiyəm!



***



Əyilməz, sarsılmaz şah vüqarımız,

Haqq deyib hayqıran xilaskarımız.

Ey şəhid əsgərim, qazim Türkiyəm!

Sən ey qəhrəmanlıq yazım, Türkiyəm!



***



Ey arxam, sipərim, qalxanım mənim,

Qarsım, Ərzurumum, Ceyhanım mənim.

Ey Məkkəm, Mədinəm, qibləm Türkiyəm!

Yürüşüm, hücumum, həmləm Türkiyəm!







İstanbul, Ankara, Ağrı dağımsan,

Ən qalib, ən igid Bayraqdarımsan.

Göylərə ucalan zirvəm Türkiyəm!

Ey yaylım atəşim, zərbəm Türkiyəm!



***

Ey ayım, ulduzum, səhərim mənim,

Qurtuluş uğrunda hünərim mənim.

Çağırışım, harayım, nərəm Türkiyəm!

Varlığım, hər damlam, zərrəm Türkiyəm!



***

Qələbə mayakım - Çanaqqalamsan,

Ən şanlı, əbədi zəfər çalansan.

Mustafa Kamalım Paşam Türkiyəm!

Sənindir gələcək yaşam, Türkiyəm!



***

Yağı düşmənlərin gözünə oxsan,

Tanrıya şükür ki, tək deyil, çoxsan.

Xoş əməl, xoş məram, niyyət Türkiyəm!

Ən ulu, ən cəsur millət Türkiyəm!







Mərdlik timsalıdır Ərdoğanların,

Əbədiyaşardır əhdin, ilqarın.

Ən sadiq silahdaş, sirdaş Türkiyəm!

Ədalət, inkişaf, çağdaş Türkiyəm!



***



Doğma Azərbaycan, ana Vətənim,

Hər yana yayılsın qoy səsim mənim.

Möhtəşəm, alınmaz qalam Türkiyəm!

Bayramın mübarək, salam, Türkiyəm!



***



Sevincimiz birdir, kədərimiz bir,

Atatürkümüzlə Heydərimiz bir.

Birgədir Ərdoğan, İlham Türkiyəm,

Dillərdə müqəddəs kəlam Türkiyəm!







Daşkəsən şəhəri , 2015-ci il.