Akademik Milli Dram Teatrın 141-ci teatr mövsümünü 9 iyul tarixində saat 19.00-da “Xanuma” tamaşası ilə bağlayacaq.

Bütövlükdə götürüldükdə 2013-2014-cü illər teatr mövsümü Akademik Milli Dram Teatrı üçün son dərəcə səmərəli yaradıcılıq prosesi ilə yadda qalıb. Cari mövsüm ərzində biri dövlət sifarişi üsulu ilə, 9-u isə daxili imkanlar hesabına olmaqla 10 yeni tamaşa hazırlanıb.



Dövlət sifarişi üsulu ilə:



1. H.Cavid “Əmir Teymur”, quruluşçu rejissor Mehriban Ələkbərzadə



Daxili imkanlar hesabına:

1.M.Vişnek “Qoca kloun tələb olunur”

2.C.Patrik “Qocanı öldürməliyik” - quruluşçu rejissor Loğman Kərimov

3.“Biri var, biri yox…” - quruluşçu rejissor Loğman Kərimov

4.S.Bekket “Krepin son lent yazısı” - quruluşçu rejissor Oruz İzzətoğlu

5. B.Nuşiç “Nazirin xanımı” - quruluşçu rejissor Mərahim Fərzəlibəyov

6. Y.Şvarts Kölgə - quruluşçu rejissor Nicat Kazımov

7. “İlahi oyun” (“Kitabi –Dədə Qorqud” dastanı əsasında), quruluşçu rejissor – Mikayıl Mikayılov) s

8. G.Dumbadze “Məqam” - quruluşçu rejissor Gümrah Ömər

9. A.Zuyev “Mən… biz…” - quruluşçu rejissor Günay Səttar



Kollektiv bitməkdə olan mövsüm ərzində üç beynəlxalq teatr festivalında (Sabançı Beynəlxalq Teatr Festivalı - Türkiyə, Adana, Min nəfəs, bir səs – Türkiyə, Konya, Milli Teatrların Festivalı – Makedoniya, Skopye) iştirak edib.

Teatr həmçinin ölkədaxili turnelərə də böyük önəm verib və “Anamın kitabı”, “Zorən şorgöz”, “Oliqarx” və “Danışan gəlincik” tamaşaları ilə Quba, Xaçmaz, Yevlax, Mingəçevir, Tovuz, Gəncə, Şəmkir, Lənkəran, Astara, Cəilabad, Şəki, Zaqatala və Balakəndə qastrol səfərlərində olub.

Nəhayət, mövsümün son tamaşası 9 iyun tarixində saat 19.00-da nümayiş olunacaq. Avksenti Saqarelinin «Xanuma» pyesi əsasında hazırlanmış eyniadlı tamaşanın quruluşçu rejissoru Mikayıl Mikayılovdur.

Tamaşada Xalq artistləri Bəsti Cəfərova (Xanuma), Cəfər Əhmədov (Knyaz), Səidə Quliyeva (Makarın anası), Əməkdar artistlər Mətanət Atakişiyeva (Kobato), Elşən Cəbrayılov (Kote), Əsgər Məmmədoğlu (Timoti), Kazım Abdullayev (Makar Tkvilkotriaşvili), Firuz Xudaverdiyev (Qoca Knyaz), Elnar Qarayev, Elçin Əhmədov, Vüsal Mustafayev, Əlləz Əhmədov (Kintolar) çıxış edirlər.

Avksenti Saqarelinin 1882-ci ildə yazdığı əsəri əsasında Azərbaycan Dövlət Akademik Milli Dram Teatrında hazırlanan tamaşada hadisələr XIX əsrdə Tiflisdə baş verir. Müflisləşən knyaz müflislikdın yaxa qurtarmaq, borclarını qaytarmaq və rahat yaşamaq üçün evlənmək istəyir, buna görə də Tiflisin ən yaxşı yengəsi Xanumanı yengə tutur. O, knyaz üçün Quliko adlı qız tapır. Digər tərəfdən Kabato adlı digər yengə knyazı öz namizədi - varlı tacir Makar Tkvilkotriaşvilinin qızı Keto ilə evləndirmək istəyir. Keto isə müəllimi, Knyazın qardaşı oğlu Koteni sevir. Nəticədə Xanuma qalib gəlir. Knyaz Quliko illə, Kote Keto ilə, Xanuma özü isə Niko ilə evlənirlər.