Bu sözləri "Mənəvi Saflığa Dəvət" ictimai birliyinin sədri AMEA-nın elmi işçisi, ilahiyyatçı alim, fəlsəfə doktoru Elşən Mustafaoğlu bu günlərdə İrəvanda keçirilən Xəzər-Qafqaz xalqları ilə bağlı konfransda özünü talış icmasının rəhbəri hesab edən Əli Əbdüli adlı şəxs guya Azərbaycanda talışlar fiziki məhv olmaq təhlükəsində olması ilə bağlı fikirlərini şərh edərkən bildirdi.



“Əvvəla qeyd edim ki, dünyanın hansı ölkəsində olursa olsun, hər bir xalqın, hər bir millətin mədəni haqları tanınmalı, ehtiram edilməlidir.

Amma bu kimi mövzuların öz ərazisində yaşayan müsəlman xalqları - yüzminlərlə Azərbaycan türklərini və kürdləri ölkədən amansızlıqla qovub çıxaran, milli-mədəni irsini məhv edib dağıdan təcavüzkar bir dövlətin paytaxtında gündəmə çıxması ciddi hal deyil.

Hər guşəsində müsəlman-türk mədəniyyətinin izi olan İrəvanda Xəzər-Qafqaz xalqları ilə bağlı konfrans keçirilirsə və bu tədbirdə başqa dövlətdəki xalqların taleyi müzakirəyə çıxarılırsa, aydın məsələdir ki, burada açıq-aşkar bir qərəz var”,-deyə alim qeyd etdi.

“Və təcavüzkar dövlətin təşkil etdiyi belə bir tədbirə hər nə adıyla olursa olsun, bir talışın qatılmasını ilk növbədə elə talış xalqının özünə bir təhqir, bir xəyanət kimi dəyərləndirirəm” deyən alim onu da əlavə etdi ki:”Ermənistanın ölkəmizə təcavüzü zamanı Azərbaycanın digər övladlarıyla bir cərgədə minlərlə talış əlinə silah alıb, Vətəninin keşiyində dayandı, şəhid verdi, qanını-canını fəda etdi. İndi bu xalqın icması adından birisi təcavüzkar Ermənistana səfər edirsə, barı bunu öz adından etsin, fərdi təşəbbüsü ilə danışsın, talışların adından yox. O adam, ümumiyyətlə bundan sonra talış icması adından çıxış etməyə mənəvi haqqını itirib”.