Azərbaycan parlamentinin üzvü, İqtisadi və Sosial İnnovasiyalar İnstitutunun rəhbəri Əli Məsimli ilə müsahibə



- Əli müəllim, bu günlərdə Gürcüstanda keçirilən seçkilər necə dəyərləndirirsiniz?



- Mən Gürcüstandakı Parlament seçkilərini GUAM-ın təmsilçisi kimi müşahidə etdim. Gürcüstanda görünməmiş insan axını ilə müşahidə olunan çox demokratik bir seçki keçirildi. Düşünürəm ki, Saakaşvili bu cür demokratik seçki ilə Gürcüstanın imicini qaldırdı, demokratik mühitdəki məğlubiyyəti ilə, isə Gürcüstanı çox ciddi kataklizmlərdən xilas etdi.



- Sizcə, Mixail Saakaşvilinin seçkilərdə məğlub olmasının əsas səbəblərini nədə görürsünüz?



- Saakaşvili sosial infrastruktur cəhətdən çox iş görsə də, əhalinin ən ümdə sosial problemlərinin həllində, xüsusən layiqli əmək haqqısı olan iş yerlərinin açılmasında yetərli qədər müsbət nəticəyə nail ola bilmədi, Gürcüstanın strateji hesab olununan məhsullarının Rusiya bazarına çıxa bilməməsi problem yaratdı. Çəzaçəkmə yerində "quraşdırılmış olay" Saakaşvilidən xeyli səs qopardı. Mən seçkilərə bir gün qalmış bu prosesləri təhlil edib, GUAM-ın Baş Katıbi ilə söhbətimdə proqnoz verdim ki, Saakaşvili 40 faiz ətrafında, İvanişvili qarışıq müxalifət isə 60 faiz ətrafında səs toplayacaq. Həmin gün inanmasalar da, səhəri gün proqnoz düz çıxdı.



- Bəs, yeni gələn komanda Saakaşvilinin qurduğu xətti dəyişdirə bilərmi?



- Gürcüstanda Saakaşvili elə bir xətt cızıb ki, onu 180 dərəcə dəyişdirmək qeyri-mümkündür. Köhnə kursun əsas məqamları qalacaq, sadəcə Rusiya ilə münasibətlər yaxınlaşma xətti götürəcək.

Amma, yeni rəhbərlik Rusiyaya tam meyl edə bilməyəcək. Bu yeni ciddi problemlər yaşadar.



- Bundan sonra Gürcüstan-Azərbaycan münasibətlərində hansısa problemlər gözlənilirmi?



- Azəbaycanla münasibətlər normal olaraq qalacaq, çünki bu həm Gürcüstanın, həm də Azərbaycanın maraqlarına uyğundur. Azərbaycan kapitalı bir qədər tərəddüddən sonra yenə Gürcüstanda geniş planda irəliləməlidir. Və bu bizim strateji hədəflərimizdən biri olmalıdır. Azərbaycan həm də Gürcüstanın müstəqilliyinə real məzmun verilməsində fəal iştirak etməlidir. Çünki Gürcüstan müstəqillik yolunda "problemlərlə" qrşılaşsa, növbə bizə çata bilər. Ona görə ayıq olmalıyıq, birlik nümayiş etdirməliyik. Özümüz naminə, qanlar hesabına qazandığımız müstəqilliyimiz naminə...