Toshkent, O`zA, 21.01.2011 – Prezidentimiz Islom Karimov rahnamoligida milliy qadriyatlarimizni tiklash, asrab-avaylash va rivojlantirish borasida amalga oshirilayotgan keng ko‘lamli ishlar samarasida o‘zbek kurashi xalqaro sport turi sifatida tobora rivojlanmoqda.



2010 yil kurash musobaqalariga boy bo‘ldi. Fevral oyida Gretsiyaning Saloniki shahrida va iyul oyida Buyuk Britaniyaning Sittingborn shahrida “Islom Karimov” an’anaviy xalqaro turniri, dekabr oyida Hindistonning Dehli shahrida yoshlar o‘rtasida VI jahon chempionati bo‘lib o‘tdi. Mazkur musobaqalarda polvonlarimiz 14 oltin, 8 kumush, 9 bronza medalni qo‘lga kiritdi.



Poytaxtimizda O‘zbekiston Kurash federatsiyasining 2010 yilgi sport mavsumi yakunlariga bag‘ishlangan yig‘ilishida shular xususida so‘z bordi.



Tadbirda 2010 yilgi sport mavsumi yakunlariga ko‘ra qator nominatsiyalar bo‘yicha g‘oliblar taqdirlandi. “Yilning eng yaxshi kurashchisi” nomiga samarqandlik Suhrob Berdiyev va qashqadaryolik O‘g‘iloy Nuraliyeva sazovor bo‘ldi. Kurash bo‘yicha Buxoro viloyati terma jamoasi bosh murabbiyi Sobir Qurbonov “Yilning eng yaxshi murabbiyi” deb topilgan bo‘lsa, “Yilning eng yaxshi federatsiyasi” nominatsiyasiga Navoiy viloyati kurash federatsiyasi loyiq ko‘rildi.



Yig‘ilishda kurashni ommalashtirish, sog‘lom turmush tarzini keng targ‘ib qilish, 2011 yilda o‘tkaziladigan jahon va qit’a chempionatlari, birinchiliklar, xalqaro turnirlarda munosib ishtirok eta oladigan iqtidorli sportchilarni mamlakat terma jamoasi tarkibiga jalb etishga oid masalalar muhokama qilindi.