15 İyul 2010 | Göndərən: Azər Həsrət



Ufa, Tatar-inform, 13.07.2010 (Fänis Fätxullin) - Başqortstan prezidentı Mortaza Räximovnı qiçä Mäsqäüğä eş säfäre barışında Rossiya prezidentı xaqimiyate başlığı Serğey Narışqin qabul itte. Söyläşü barışında Başqortstanda Mortaza Räximovnı almaştıraçaq däğvaçılar xaqında da fiqer alışu bulırğa mömqin, di bäysez säyasät belğeçläre.



Soñğı qönnärdä Başqortstanda Mortaza Räximov tizdän vazıyfasınnan qitäçäq, diğän farazlar eş işetelde. Şul uq vaqıtta Rossiya qiñqüläm mäğlümat çaralarında Başqortstan xaqimiyatlärenä, aerım alğanda, Mortaza Räximovqa häm anıñ ulı Ural Räximovqa qisqen ğaeplär taşlağan yazmalar häm tapşırular taşqını qöçäyde. Şul arada, uzğan atnada, Başqortstan Däülät Cıelışı-Qorıltay Ural Räximovnı deputatlıqtan çığardı. Bu eş Ural Räximovnıñ üzeneñ ğarizası belän eşlände, dip äytelde räsmi xäbärlärdä.



Ural Räximov soñğı ber elda, çit ildä yaşäü säbäple, parlament utırışlarında qatnaşmadı. Aña qadär dä iqe el çaması anıñ Ufadağı ber xastaxanädä daimi yaşäp saulığın nığıtuı xaqında bar cämäğatçeleqqä bilğele ide. Ul çaqta da Başqortstan Däülät Cıelışı-Qorıltay utırışlarında siräq qenä qürende ul. Bäysez analitiqlar äytüençä, Ural Räximov deputatlıqtan qitärğä ğarizanı üze yazmağan, ä aña şulay qiñäş itqännär. Monıñ säbäbe şunda, di alar, Başqortstannan eleqqe senator, öç el inde Mäsqäüdä törmädä utıruçı İğor İzmestev Ural Räximovnı ğaepläp biq qüp mäğlümatlar birä. “Äğär bu eş centeqle tiqşerelsä, Ural Räximovnı da mäxqämäğä tartırğa mömqinnär, – di Başqortstan Berläşqän oppoziçiyase başlığı Ramil Biğnov. – Ä bu isä şunda uq Başqortstan Däülät Cıelışına da qara tap töşeräçäq. Şul xälne buldırmas öçen, deputatlar prezident ulın üz saflarınnan tizräq çığarırğa bulğan”.



Moña qadär soñğı unbiş el çaması Başqortstan yağulıq-enerğetiqa tarmağına qarağan şirqätlärne üz qulında totqan, ä vazıyfasınnan tämam qitqänçe, soñğı iqe elda, räsmi räveştä, “Başneft” şirqäteneñ ğeneral direqtorı vazıyfaların başqarğan Ural Räximov xäzer respubliqada üz yoğıntısın yuğalttı, dip belderä iqtisad belğeçläre. Başqortstannıñ yağulıq-enerğetiqa tarmağına qarağan şirqätlärne Rusiyaneñ “Sistema” xoldinğı satıp alğan ide. Ä inde yaña xucalar Ural Räximov belän xezmät qileşüen ozaytmadı.



Başqortstandağı xällärğä soñğı qönnärdä Mäsqäü televidenie qanalları häm internet säxifäläre qübräq iğtibar birä başladı. Niğezdä, respubliqadağı qire qüreneşlär yaqtırtıla alarda. Qiçä Ren-tv qanalındağı “Spravedlivost” proğrammasında da Başqortstandağı başbaştaqlıqlar xaqında fiqerlär yañğıradı.



Bäysez säyasät belğeçläre raslavınça, qiçä Mäsqäüdä Serğey Narışqin belän bulğan oçraşuda Mortaza Räximov üzeneñ vazıyfasınnan qitüe xaqında ğariza yazğan bulırğa tieş. “Başqortstannıñ aldağı prezidentlığına isemleq bilğele inde häm bu qeşeneñ iseme yaqın arada uq bäyan itelerğä mömqin. Ul qeşe Mortaza Räximov qomandasınnan bulmasqa da mömqin”, – dip belderä Ufadağı tanılğan ğalim, iqtisad fännäre doqtorı Rinat Ğataullin.



Mortaza Räximov Başqortstanğa 20 el citäqçeleq itä inde. 77nçe yaşe belän barğan M. Räximov Rossiyadä iñ qart töbäq başlığı.