Dekabr ayının 12-də Azərbaycan Dövlət Mədəniyyət və İncəsənət Universitetində Azərbaycanın ümummilli lideri Heydər Əliyevin anım gününə həsr olunmuş “Heydər Əliyevin Mədəniyyət konsepsiyası” mövzusunda elmi seminar keçirilib. Tədbirdə akademik, millət vəkili, Azərbaycan Respublikası Milli Məclisinin Mədəniyyət Komitəsinin sədri Rafael Hüseynov, ADMİU-nun rektoru, professor-müəllim heyəti və tələbələri, həmçinin media nümayəndələri iştirak edib.

Tədbiri ADMİU-unun rektoru, professor Ceyran Mahmudova açaraq, qonaqları və seminar iştirakçılarını salamlayıb. Azərbaycan tarixində misilsiz xidmətləri olan qüdrətli dövlət xadimi Heydər Əliyevin mədəniyyətimizə, milli-mənəvi dəyərlərimizə qayğısından söz açan rektor qeyd edib ki, bu zala toplaşanların əksəriyyəti Azərbaycanın görkəmli mədəniyyət və incəsənət xadimləridir və onlar Heydər Əliyevin mədəniyyətə göstərdiyi diqqət və qayğının canlı şahidləridir.

Bildirilib ki, bu gün Heydər Əliyevin yolunu layiqincə davam etdirən cənab prezident İlham Əliyev ümummilli liderin ideallarını yeni tarixi şəraitdə müvəffəqiyyətlə həyata keçirir.

Sonra akademik Rafael Hüseynov Heydər Əliyevin mədəniyyət konsepsiyasını açıqlayan məruzə ilə çıxış edərək, ümummilli liderin həyat və fəaliyyəti, ölkə mədəniyyətinin inkişafındakı misilsiz xidmətləri haqqında ətraflı məlumat verib. Millət vəkili bildirib ki, məhz ümummilli liderin mədəniyyət siyasəti nəticəsində qədim zəngin maddi və mənəvi irsə malik xalqımız öz varlığı, mənəvi irsi, keçmişi ilə fəxr edə bilər. Ulu öndərin Azərbaycan mədəniyyətinin və mənəviyyatının himayədarı olduğunu deyən Rafael Hüseynov onun hələ sovet dövründə yaradılan maneələrə baxmayaraq, ölkə mədəniyyətinin inkişafı üçün əlindən gələni etdiyini vurğulayıb, müasir müstəqil Azərbaycan dövlətinin memarı Heydər Əliyevin xidmətləri nəticəsində Azərbaycan mədəniyyətinin yüksəliş dövrü keçdiyini diqqətə çatdırıb. Akademik Rafael Hüseynov qeyd edib ki, ümummilli lider Heydər Əliyev respublikamızın yaradıcı insanlarına, tanınmış ədəbiyyat, mədəniyyət və elm xadimlərinə daim diqqət və qayğı ilə yanaşıb.

Natiq Azərbaycan mədəniyyətinin inkişafı istiqamətində əsası ulu öndər tərəfindən qoyulan işlərin bu gün onun siyasi kursunun layiqli davamçısı Prezident İlham Əliyev tərəfindən uğurla davam etdirildiyini vurğulayıb.

Tədbirin sonunda İ.Məmmədəliyevin çəkdiyi “Heydər Əliyev. Mədəniyyətimizin hamisi” filmi nümayiş olunub.

Tədbirdən sonra Universitetin rəhbərliyi və professor-müəllim heyəti Fəxri Xiyabanda ulu öndərin məzarını ziyarət edib, onun xatirəsini hörmət və ehtiramla yad edib, məzarı üzərinə gül dəstələri qoyublar.