18-19 avqust 2018-ci il tarixdə Azərbaycan Respublikası Təhsil Nazirliyinin Təhsildə inkişaf və innovasiyalar üzrə 2-ci qrant müsabiqəsi çərçivəsində “Məktəblilərin sağlamlıq və idman klubu” layihəsinin təlim düşərgəsi baş tutdu. Layihə çərçivəsində Lənkəran rayonunun 25 orta məktəbinin şagirdləri üçün “Sağlam həyat tərzi”, “Sağlamlıq və İdman”, “Zərərli vərdişlərə yox”, “Liderlik” və “Məktəbdaxili idman yarışlarının səmərəli təşkili qaydaları” mövzularında təlimlər, təlim mövzularıyla bağlı maraqlı bilik və idman yarışları təşkil olunub.

20 avqust 2018-ci il tarixdə isə “Məktəblilərin sağlamlıq və idman klubu” layihəsi iştirakçılarının “Zərərli vərdişlərə yox” adlı yerüstü rəsm aksiyası uğurla həyata keçirilib. Məktəblilər yerdə insanları zərərli vərdişlərə qarşı mübarizəyə səsləyən təsirli şəkillər və şüarlar çəkərək bu istiqamətdə ilk fəaliyyətlərinə start verib.

Layihənin rəhbəri, Lənkəran rayonu Tükəvilə kənd tam orta məktəbinin müəllimi Samir Salayev layihə haqqında bunları deyib: “ “Məktəblilərin sağlamlıq və idman klubu” layihəsinin əsas yanaşma tərzi bu mövzuda bugünə qədər təşkil olunan təlim sessiyalarında fərqlidir. Fərq odur ki, biz bu layihəmizdə “Bu zərərli vərdişdir, bunu etmə!” ideya formatından daha effektiv ideya irəli sürürük: “Zərərli-pis vərdişi faydalı-yaxşı vərdişlə əvəzlə!”. Burada faydalı-yaxşı vərdiş kimi idmanı təklif etmişik. Biz bu məqsədlə məktəblərində öz həmkarları üçün müxtəlif idman yarışları təşkil edəcək şagirdlər yetişdiririk. Zərərli vərdişlərə meyilli kütləni idmana cəlb etmək zərərli vərdişlərə qarşı ən effektiv mübarizədir! Layihəmiz bitdikdən sonra da, iştirakçı məktəblilər bu ideyanı öz məktəblərində könüllü şəkildə daim davam etdirəcəklər. Bu istiqamətdə birgə hətta tədbirlər planı da tərtib etmişik. Bizim üçün bu şəraiti yaradan Təhsil Nazirliyinə həm öz adımdan, həm də layihəmizin iştirakçıları adından bir daha təşəkkürümü bildirirəm.”



Qeyd edək ki, “Məktəblilərin sağlamlıq və idman klubu” layihəsi 02.07.2018-01.10.2018 tarixlərində Lənkəran rayonu üzrə həyata keçirilir.