“Sevənlər, ayrılanlar, gözləri yolda qalanlar, ümid gözləyənlər limanlara gedirlər, mənəvi rahatlıq tapırlar. Bu rahatlıq limandan ucu-bucağı görünməyən dənizi seyr etməklə davam edir. Amma dəniz ya sadiq dost, ya da amansız düşmən olur. Dəniz nə qədər dalğalı, tufanlı olsa da, onun da öz dostları var: qağayılar. Onlar hər zaman dənizi tək buraxmırlar.”

Bunu mətbuata açıqlamasında Azərbaycanın xalq artisti, korifey sənətkar Mirzə Babayevin ifa etdiyi “Limanlar” mahnısını yeni aranjemanda səsləndirən müğənni Aref Kemal təəssüratlarını bölüşərkən deyib. O, bildirib ki, musiqisi Rəşid Nəsiboğlu, sözləri Adil Rəsulə məxsus olan “Limanlar” mahnısının musiqisi ruhuna çox yaxındır:

“Bu mahnıya obraz lazım deyil. Mahnı özü dinləyiciyə hər şeyi deyir. Dənizlə bağlılığım doğmadır. Çünki dənizdə çalışdığım üçün mahnıya aşiq oldum və ifa etməyə qərar verdim. Mahnını hər dəfə ifa etdiyim zaman kövrəlirəm. Mahnını korifey sənətkarmız Mirzə Babayevin ifasında eşitmişəm və çox bəyənmişəm. Allah Mirzə müəllimə rəhmət eləsin!”

Məlumat üçün bildirək ki, “Azərbaycanın səsi” mahnı müsabiqəsinin sevilən iştirakçılarından olan Aref Kemal hazırda Mədəniyyət və İncəsənət Universetinin estrada müğənnisi fakültəsinin 4-cü kurs tələbəsidir. O, Azərbaycanın xalq artisti Nazpəri Dostəliyevadan vokal dərslərini öyrənir.